«Շիրակը» պատասխաններ է ակնկալում ՀՖՖ ղեկավարությունից կապված «Լոռիի» շուրջ ստեղծված իրավիճակի հետ

Գյումրու «Շիրակի» մամուլի ծառայությունը հաղորդագրություն է տարածել կապված հայկական ֆուտբոլում տեղի ունեցող վերջին իրադարձությունների հետ, մասնավորապես խոսքը վերաբերում է Վանաձորի «Լոռիի» առաջնությունից դուրս գալու որոշմանը:

«Ինչպես արդեն հայտնի է VBET Հայաստանի Պրեմիեր լիգայում իր ելույթները դադարեցրել է Վանաձոր քաղաքը ներկայացնող «Լոռի» թիմը:

Այսօր Հայաստանում հատկապես մարզային ֆուտբոլը իր ոչ լավագույն ժամանակներն է ապրում: Եվ այս պայմաններում «Լոռի» թիմը նոր շունչ և գույներ է հաղորդել հայկական ֆուտբոլին: Իսկ ակումբը կոչված էր զարգացնելու ֆուտբոլը ողջ մարզում և վերականգնելու Լոռվա ֆուտբոլի բարի համբավը:

Որպես առաջնության մասնակից ակումբ մեզ խորը մտահոգում է կատարվածը և առաջացնում է հարցեր, որոնց պատասխաններն ակնկալում ենք ստանալ ՀՖՖ ղեկավարությունից:

Անկախ նրանից, թե որքանով են արդարացված Վանաձորի ֆուտբոլի ակադեմիայի ներկայացրած պահանջները, մտահոգիչ է, որ տևական ժամանակ ակումբը չի ստացել բողոքարկման կոմիտեի որոշումները, ինչն ավելի է մեծացնում տարակուսանքը ակումբների շրջանում: Այն էլ այն պարագայում, երբ ըստ սահմանված ընթացակարգերի Բողոքարկման կոմիտեն որոշում պետք է կայացներ յոթ օրվա ընթացքում: Իսկ այժմ բողոքի մի հայցով Վանաձորի ֆուտբոլի ակադեմիան սպասում էր ավելի քան վեց ամիս:

Նման գործելաոճով խախտվում են ակումբների հիմնարար իրավունքներից մեկը՝ բողոքարկելու և/կամ վիճարկելու իրավունքը:

Կոչ ենք անում ՀՖՖ ղեկավարությանը պարզաբանումներ տալ, թե ինչու է գործընթացն այսքան ձգձվում և հանգեցնում նման իրավիճակի, երբ Պրեմիեր լիգայի մասնակից ակումբը չի ցանկանում շարունակել ելույթները:

Համոզված ենք, որ Պրեմիեր լիգան լքելու գործընթացը կկրի շարունակական բնույթ, եթե չիրականացվեն համապարփակ վերլուծություններ և չկատարվեն հրատապ համարժեք քայլեր հայկական ֆուտբոլում տիրող անառողջ մթնոլորտի հաղթահարման ուղղությամբ»,- ասված է «Շիրակի» հայատարարությունում:

Միացեք Football365.am-ի տելեգրամի ալիքին՝  https://t.me/football365am