«Իմ սիրտը պատկանում է «Ռոմային»․ Տեմի Աբրահամ

«Ռոմայի» հարձակվող Տեմի Աբրահամը Իտալիայի «A» սերիայի 38-րդ տուրի՝ «Տորինոյի» (3։0) հետ խաղից հետո ամփոփել է  մրցաշրջանը և խոսել է Կոնֆերենցիաների լիգայի եզրափակչից իր սպասելիքների մասին։

«Իհարկե, կցանկանայի հեթ-տրիկ գրանցել, սակայն այսօր կարևորը հաղթանակն էր։ Սա երկար և ծանր մրցաշրջան էր։ Շնորհիվ իմ բոլոր խաղընկերների՝ մենք լավ աշխատեցինք։ Մենք առջևում ունենք եզրափակիչ, որին անհամբեր սպասում ենք և շատ հուզված ենք։

Ինչպես միշտ ասում էի, ես առաջին օրվանից  սիրահարված եմ այս ակումբին և միշտ կփորձեմ առավելագույնս օգնել թիմին՝ իմ գոլերով և գոլային փոխանցումներով։ Սա լավ տարի էր ինձ համար, հուսով եմ զարգացնել այն։ Հուսով եմ՝ մենք կկարողանանք մրցաշրջանը եզրափակել տիտղոսի նվաճմամբ  և  այդ դեպքում այս տարին իդեալական կլինի։

Վերադա՞րձ ԱՊԼ։ Ես սիրում եմ այս ակումբը։ Այստեղ ինձ  դրսևորելու հնարավորություն են տվել։ Տեսնենք, թե ինչ է սպասվում մեզ ապագայում, բայց իմ սիրտը պատկանում է «Ռոմային»,- Աբրահամի խոսքերն է  մեջբերում  DAZN-ը։